30-Imaam Ibn 'Uthaymiyn: Hakulipa Deni La Swiyaam Kwa Kutokujua Siku Alizofungulia Afanyeje?
Fataawaa Mas-ala 60 Kuhusu Hedhi Na Nifaas
30-Hakulipa Deni La Swiyaam Kwa Kutokujua Siku Alizofungulia Afanyeje?
Imaam Ibn 'Uthaymiyn (Rahimahu-Allaah)
SWALI:
Muulizaji anauliza: Tokea imuwajibikie Swiyaam, amekuwa akifunga Ramadhawaan lakini hakuwa akilipa siku alizoshindwa kufunga kwa sababu ya ada yake ya mwezi na vile kutokujua siku alizofungua. Anaomba maelekezo cha anachotakiwa kufanya?
JIBU:
Inatusikitisha kutokea mas-ala kama haya kwa wanawake Waislaam.
Kuacha huku, yaani kuacha kulipa deni (la Swiyaam) za kumuwajibikia, itakuwa ni ima kwa sababu ya ujahili au kwa sababu ya uzembe, na yote hayo yote ni msiba, kwa kuwa ujahili tiba yake ni elimu na kuuliza.
Ama uzembe tiba yake ni taqwa ya Allaah ('Azza wa Jalla) na kuchunga maamrisho Yake na kuogopa adhabu Yake na kukimbilia kufanya yale yenye kumridhisha.
Hivyo ni juu ya mwanamke huyu kutubia kwa Allaah kwa alichokifanya na aombe maghfirah na kujaribu kukumbuka siku alizoacha kwa kadiri ya uwezo wake na alipe. Kwa haya dhima yake itaondoka na tunataraji Allaah Ataqabali tawbah yake.
